Վերապրած երգեր. արևմուտքից՝ արևելք

Այս վավերագրությունն Արևմտյան Հայաստանից Արևելյան Հայաստան գաղթի արդյունքում ձևավորված զանազան հայկական համայնքներից հավաքված պատմություններից ու երգերից բաղկացած ազգագրական մի կոլաժ է։ XVIII դարի վերջից մինչև XX դարի կեսը հայերի դեմ ծավալված պատերազմների, ճնշումների ու, ի վերջո, Հայոց ցեղասպանության պատճառով` հայերն Արևմտյան Հայաստանից գաղթում էին աշխարհի տարբեր ծայրեր, այդ թվում՝ ներկայիս Հայաստանի տարածք։ Արևմտյան Հայաստանից մնացած միակ ժառանգությունը մշակույթն է՝ երգերը, պարերը, ավանդություններն ու հիշողությունները։ Եղեռնը վերապրածների երկրորդ սերունդը պահպանում է այդ ժողովրդական երգերը՝ հաջորդներին փոխացնելու հույսով։ Ժամանակի ընթացքում շատ երգեր մոռացվել են, բայց որոշները՝ պահպանվել։ Այժմ դրանք պահպանվում են երիտասարդ երաժիշտների շնորհիվ, որոնք երգերը վերաիմաստավորում ու կատարում են տարբեր երաժշտական մշակումներով։